Connect with us

Fréttir

Snæbjörn Brynjarsson segir af sér sem varaþingmaður Pírata

Sett inn:

þann

Snæbjörn Brynjarsson hefur ákveðið að segja af sér sem varaþingmaður Pírata vegna óviðeigandi hegðunar gagnvart Ernu Ýr Öldudóttur, blaðamanni hjá Viljanum og fyrrverandi formanni framkvæmdaráðs Pírata, á skemmtistað í Reykjavík um síðustu helgi. Fréttablaðið greindi frá því í morgun að Ernu Ýr hafi þótt ummæli sem Snæbjörn lét falla „óþægileg og ógnandi”.
.

Snæbjörn sendi frá sér yfirlýsingu á facebook í kjölfarið. Þar segist hann hafa misst stjórn á skapi sínu og sagt hluti sem „voru með öllu óviðeigandi”. Sú hegðun sem hann hafi sýnt sé ekki sæmandi kjörnum fulltrúa. Hann muni axla fulla ábyrgð á gjörðum sínum, biðji alla hlutaðeigandi afsökunar og voni að sem minnstur skaði hafi hlotist af. 

Snæbjörn segist hafa ákveðið að segja af sér tafarlaust sem varaþingmaður Pírata fyrir Reykjavíkurkjördæmi suður og víkja úr öllum ábyrgðarstöðum sem Píratar hafi falið honum.

Eftirfarandi er færsla Snæbjörns á facebook: ,,Aðfararnótt laugardags rakst ég á Ernu Ýr Öldudóttur, blaðamann og fyrrverandi formann framkvæmdaráðs Pírata, á skemmtistað í Reykjavík. Ég missti stjórn á skapi mínu og sagði hluti við hana sem voru með öllu óviðeigandi. Sú hegðun sem ég sýndi umrætt kvöld er ekki sæmandi kjörnum fulltrúa. Ég mun axla fulla ábyrgð á gjörðum mínum og bið alla hlutaðeigandi afsökunar og vona að sem minnstur skaði hafi hlotist af.

Í ljósi atburða liðinnar helgar hef ég því ákveðið að segja af mér sem varaþingmaður Pírata, frekar en að láta þessa hegðun kasta rýrð á samstarfsfélaga mína og Alþingi. Mér er annt um virðingu Alþingis, traust fólks á kjörnum fulltrúum, en sér í lagi er mér annt um þau þúsundir manna sem kusu Pírata og öll þau hundruð sem lögðu á sig þrotlausa sjálfboðavinnu til að tryggja mér kjör.

Af virðingu fyrir því umboði sem allt þetta fólk veitti mér hef ég ákveðið að segja af mér tafarlaust sem varaþingmaður Pírata fyrir Reykjavíkurkjördæmi suður og víkja úr öllum ábyrgðarstöðum sem Píratar hafa falið mér. Ég ætla mér að læra af þessum mistökum og biðst innilega afsökunar á hegðun minni.”

Athugasemndir
Lesa meira

Fréttatíminn © 2018