Connect with us

Fréttir

Róbert segir Kastljósviðtal Lilju „æft“ og „sviðssett“: „Skaut yfir markið með ofbeldistali sínu“

Sett inn:

þann

Róbert Trausti Árnason, fréttastjóri Hringbrautar, tekur annan pól í hæðina en margir varðandi Kastljósviðtal Lilju Alfreðsdóttur, þingmanns Framsóknarflokksins, vegna ummæla sexmenninganna á Klaustur bar um sig í leyniupptökunum. Ritstjórn DV- Eyjan fer vandlega yfir málið í nýrri grein á DV.is í dag og þar segir m.a :

,,Lilja talaði um sexmenningana sem ofbeldismenn sem ættu ekki að hafa dagskrárvaldið og þótti henni almennt takast vel upp, var henni hampað og hrósað á samfélagsmiðlum og sögð hafa veitt Miðflokknum rothögg með frammistöðu sinni.

Róbert Trausti er ekki á sama máli og segir frammistöðu Lilju „æfða“ og „sviðsetta“ af fagmönnum. Þá gagnrýnir hann orðanotkun Lilju einnig:

„Einhverjir almannatenglar hafa reynt að halda því fram í dag að Lilja Alfreðsdóttir hafi náð að „slá Miðflokkinn niður“ í sjónvarpsviðtali sem RÚV flutti í gær. Þetta er mikill misskilningur. Annað hvort eru þeir sem álykta með þessum hætti ekki nægilega vel að sér eða þá eru þeir að reyna að koma inn tilteknum viðhorfum hjá fólki. Lilja kom vel fyrir í sjónvarpsviðtalinu enda virtist sýningin hafa verið æfð og sviðsett af mikilli kostgæfni undir stjórn fagmanna. Um það er allt gott að segja. Stjórnmálamenn eiga að nýta sér ráðgjafa og mikilvægt er að velja sér rétta PR-fólkið til verka.

Sigmundur Davíð og félagar á Klaustur-barnum voru kallaðir „ofbeldismenn“ í þessu viðtali. Lilja sakaði þá um ofbeldi vegna þeirra dónalegu orða sem þeir létu falla. Varla er deilt um það að félagarnir á barnum sýndu dómgreindarleysi. Á þeim var sorakjaftur og ætla má að eitthvað hafi farið úrskeiðis í uppeldi þeirra frá öndverðu. En beittu þeir ofbeldi? Samkvæmt almennum íslenskum málskilningi er ofbeldi annað og miklu meira en dónalegt orðbragð og fylliríisröfl miðaldra fólks.“

Skot yfir markið

„Lilja Alfreðsdóttir skaut yfir markið með ofbeldistali sínu og yfirlýsingu um að hún gæti aldrei fyrirgefið það sem sagt var.Aldrei að segja aldrei er stundum bent á. Ef Lilja ætlar að vera áfram í pólitík þá er betra að gefa ekki svona afgerandi yfirlýsingar. Sjálfstæðisflokkurinn ætlaði til dæmis aldrei að vinna í ríkisstjórn undir forystu sósíalista. En gerir það samt og þurfti að éta stórt ofan í sig. Lilja hefur ótakmarkaðan metnað og hún mun gera hvað sem er til að ná lengra á sviði stjórnmálanna. Þennan metnað hefur hún frá föður sínum, Alfreð Þorsteinssyni fyrrum borgarfulltrúa Framsóknar, manninum sem ber höfuðábyrgð á fjárfestingarhneykslinu sem hús Orkuveitu Reykjavíkur er og kostar borgarbúa marga milljarða. Alfreð var alltaf til í að semja um allt fyrir völd. Lilja hefur verið talin geta orðið sáttasemjari milli Framsóknar og Miðflokks en gamla framsóknarmenn dreymir um að sameina þessa systurflokka. En í gær slökkti hún á þeirri von. Það getur ekki orðið sátt um Lilju eftir að hún kallaði forystu Miðflokksins „ofbeldismenn“. Þar með fór sú von.“  Segir m.a. á DV.is um grein fréttastjórans.  Hér er hægt að lesa greinina í heild sinni á DV.is

Einelti á Alþingi íslendinga í boði Loga Einarssonar og Co. – Forseta Alþingis skylt að grípa inn í skv. lögum

 

 

Athugasemndir
Lesa meira

Fréttatíminn © 2018